Boazum: Dûnsskoalle nei Friesen-Droapen

Geplaatst door redactie op 05/03, 09:04 uur.

BOAZUM De Dûnsskoalle Enequist fan Boazum wurket dit jier mei oan de 17de Ynterfryske Friesen-Droapen, fan 28 oant en mei 30 maaie op Hilgelân.

De Friesen-Droapen, foarhinne de Sternfahrt der Friesen, is in kultureel festival dat om ‘e trije jier hâlden wurdt foar de Friezen út de hiele wrâld, mar benammen út de trije Fryske regio’s: de Dútske Noard- en Eastfriezen en ús saneamde Westerlauwerske. Nij yn it programma fan 2010 binne in polityk kafee yn it Hilgelanner gemeentehûs en in Ynterfryske itensiederswurkwinkel.

De Fryske jongerein is dit jier ek wer goed fertsjintwurdige. Twa jongereingroepen fan de Boazumer Dûnsskoalle Enequist binne fan de partij en der wurde typysk Fryske sport- en spulaktiviteiten organisearre; foar Fryslân fersoarge troch de jeugd fan it FYK (Frysk Ynternasjonaal Kontakt).

Op ûnderskate plakken op it reade rotseilân binne optredens fan artysten út de trije Fryske gebieten. Ut namme fan ús Fryslân giet de Ljouwerter Skotsploech mei, lykas de artysten Rob du Jardin & Grytsje Kingma. Rob du Jardin wûn yn 2009 de publykspriis fan it Fryske sjongefestival Liet. Fierders hat elk genôch gelegenheid om it eilân op eigen gelegenheid te ûntdekken. Yn ‘e regel kinne boattochtsjes om Hilgelân makke wurde, it oanbuorjende eilantsje Düne kin besocht wurde, men kin oanslute by in fûgelekskurzje, in rûnlieding troch de bunkers of him deljaan yn ien fan ‘e Hilgelanner kroechjes en restaurantsjes. Boppedat is der in nagelnij swimbad en binne der in oantal musea op it belestingfrije eilân. Belangstellenden foar de Hilgelân-reis kinne har opjaan oant heal april.

It Friesen-Droapen wurdt mei mooglik makke troch de Provinsje Fryslân en de Douwe Kalma Stifting. Mear ynformaasje oer it Friesen-Droapen is te finen www.fryskerie.nl.

Categorieën: redactie